أنوسة كوتة ترد على أيمن بهجت قمر بعد الدرع الماسي لرحيم

قام أحد أصدقاء الملحن محمد رحيم ويدعو حمادة البيلي بتهنأته بعد أن حصل على شهادة الاحتراف الدولية الماسية. 
وقال حمادة عبر فيس بوك:"ياريت كل اللي عندي يبارك ليه
النهارده الملحن المصري العربي العالمي محمد رحيم استطاع انه يحقق انجاز لمصر محدش قدر يعمله غيره منذ بدايه التاريخ الموسيقي في مصر لحد الان و هو حصوله  علي شهاده الاحتراف الدوليه الماسيه او بمعني اصح درع الإبداع الماسي العالمي و دي تعادل جايزه الأوسكار بس في الموسيقي وكما هي العاده تجاهل تام من الدوله و مؤسسات الف مليار مبروك لصديقي الخلوق الموهوب محمد رحيم". 
من جانبه علق الشاعر أيمن بهجت قمر موضحا أن رحيم ليس الوحيد الذي حصد ذلك التكريم وقال عبر التعليقات على المنشور:"مبروك لرحيم بس انا ووليد سعد وعمرو مصطفى تم تكريمنا ودعوتنا برضه في نفس الحفل أنا بوضح عشان ده حقنا .. وعلى فكره الموضوع طبعا تكريم بس مش بالصوره دي وانا اعتذرت عن الحضور". 
وتابع أيمن في تعليق آخر:"الموضوع كله عباره عن اننا بقينا بدل ما كنا اعضاء بروفيشنال بقينا اعضاء دائمين وده شئ يشكروا عليه ولمجموعه كبيره ومنهم مروان خوري كمان وانا والزملا اللي ذكرت بعضهم والحفل بسيط مش جائزه عالميه والحضور على حسابنا كمان عشان كده كبرت ". 
فعلقت مدربة الأسود أنوسة كوتة وزوجة محمد رحيم على حديث أيمن بهجت قمر وقالت عبر التعليقات:" لا حول ولا قوة الا  بالله.. انا مش عارفه انت زعلان قوي كده ليه من رحيم .. مع العلم كل ما بتجي سيرتك بلاقيه بيشكر فيك جدا". 
فرد عليها أيمن وقال:"خالص والله حضرتك فاهماني غلط بس حضرتك اقري صيغة الخبر فيه اجحاف لحقنا مع كامل الاحترام لحضرتك ولرحيم اعتقد ان الموقف لو بالعكس حضرتك هتدافعي عن حق محمد و البوست بيصدر ان ده انجاز تاريخي وحيد ودي مش حقيقه،  كامل حبي واحترامي وتقديري لحضرتك ولرحيم والله ده حقنا الطبيعي". 
فعلقت مرة ثانية أنوسة وقالت:"   معلش هو اجحاف في ايه ... اولا حمادة بيكتب كلمتين شكر لصديقه وهو مش جهة صحفية عشان حضرتك تزعل قوي كده منه ولو حضرتك عايز تزعل ..ممكن ايميل للساسيم وتطلب منهم ينزلوا صوركوا في المجلة بتاعتهم عشان نعرف (كجمهور)  ان حضرتكم معاكوا نفس الجائزة زي ما بيعملوا مع رحيم علي طول ..وثانيا وفيها ايه لما مبدع مصري زي رحيم وحضرتك وعمرو مصطفي وأسماء تانية تحصل علي نفس التكريم من نفس المؤسسة مع اختلاف الدرجات ان حضرتكوا ذهبية ورحيم ماسية ولتاني مرة في عمره الفني .. مش ده بدل ما ملحن هندي ياخدها بدلكوا ...؟ وبرضو بكرر احترامي وتقديري لحضرتك". 
لينهي أيمن بهجت قمر الحديث ويقول:"  بعتذر لحضرتك لو كلامي ضايقك بس حضرتك مش واصل لك وجهة نظري عموما الموضوع مش شخصي وحضرتك ليكي مني كل تقدير واحترام".